Tveir 16 ára í einangrun á Litla-Hrauni

Tveir sextán ára piltar, sem grunaðir eru um yfir 80 innbrot í Grímsnesi, Borgarfirði, Dölunum og á Þingvöllum í maí, eru nú vistaðir í einangrunarklefum á Litla-Hrauni. Þar hafa þeir verið í rúma viku og verða fram á þriðjudag hið minnsta.

Lögum samkvæmt er óheimilt að úrskurða ungmenni undir átján ára aldri í gæsluvarðhald nema sérstaklega standi á. Í tilfelli piltanna ungu stendur ekkert annað úrræði til boða fyrir þá en vistun á meðferðarheimilinu Stuðlum, að því er fram kemur í gæsluvarðhaldsúrskurði. Þar er hins vegar ekki pláss auk þess sem annar sakborningur í málinu, fimmtán ára gamall piltur, er vistaður þar og engin leið væri að koma í veg fyrir að hann hefði samskipti við aðra grunaða í málinu.

Páll Winkel fangelsismálastjóri segir ákaflega sjaldgæft að jafn ungir menn séu úrskurðaðir í einangrun. Hann segist í svipinn ekki muna hvenær það henti síðast, en yfirleitt líði árafjöld milli slíkra tilvika. Gæsluvarðhaldsfangar undir lögaldri fái enga sérmeðferð, en njóti líkt og aðrir aðstoðar sálfræðinga og geðlækna.

Páll segir stofnunina ekki hafa mikið um ákvarðanir sem þessar að segja. „En ef einangrunin dregst á langinn og er mjög íþyngjandi og hefur mjög slæm áhrif á viðkomandi þá getum við haft samband við ákæruvaldið og látið vita. Það hefur gerst."

Margrét María Sigurðardóttir, umboðsmaður barna, var stödd erlendis þegar Fréttablaðið náði tali af henni og hafði ekki kynnt sér málið. „En þetta hljómar mjög illa og mér finnst þetta engan veginn nógu gott," sagði hún.

Fjórði sakborningurinn í málinu, átján ára Íslendingur, er einnig í einangrun á Litla-Hrauni. - sh