Rofar til seinnipartinn

Skyggni yfir Suðurlandi og höfuðborgarsvæðinu hefur lítið breyst frá því morgun en talið er að það muni rofa til seinnipartinn. Líkt og undanfarna daga liggur aska yfir nágrenni Eyjafjallajökuls og höfuðborgarsvæðinu, en þó í mun minni mæli en í gær að sögn Hrafns Guðmundssonar, veðurfræðings hjá Veðurstofunni. Hann segir erfitt að spá fyrir um dreifingu öskunnar.

Nokkur órói hefur mælst frá miðnætti í nótt sem náði toppnum um klukkan níu í morgun. Gunnar Guðmundsson, jarðeðlisfræðingur hjá Veðurstofunni, segir að óróinn sjáist víða á mælum en hann tekur fram að ekki er um jarðskjálfta að ræða. Gufusprengingar og minniháttar tilfærsla á kviku er meðal þess sem getur orsakað óróann, að sögn Gunnars. Áfram verði fylgst vel með framvindu mála.