„Ég óttast ekki dómstólaleiðina“

Nýr innanríkisráðherra, Ögmundur Jónasson, sem hætti á sínum tíma sem heilbrigðisráðherra vegna andstöðu við Icesave-málið er nú bjartsýnn á að farsæl niðurstaða fáist í málinu. Samningaviðræður standa yfir í Lundúnum.

Ögmundur Jónasson, þú greindir frá því í gær að aðstæður hefðu breyst í Icesave-málinu. Hvað áttirðu við? „Málið var komið í pólitískan hnút vegna þess að ekki hafði verið leitað eftir nægilega breiðri aðkomu allra stjórnmálaflokka á þingi um málsmeðferð. Á þessu hefur verið ráðin bót. Ný samninganefnd kom að málinu og ég tel að með þessu móti hafi málið verið sett inn í annan farveg. Síðan hefur ýmislegt gerst til að styrkja okkar stöðu," segir Ögmundur Jónasson, nýr innanríkisráðherra. Viðræður samninganefndarinnar undir forystu bandaríska lögmannsins Lee Buchheits standa nú yfir í Lundúnum. Ögmundur segir að það sem gerst undanfarið hafi styrkt stöðu Íslendinga, enda hafi Evrópusambandið sjálft lýst efasemdum um að ríkisábyrgð sé á innstæðum samkvæmt tilskipun um innstæðutryggingar.

„Hitt deila menn ekki um að við kynnum að vera dæmd ábyrg engu að síður fyrir greiðslum. Þá vegna þess að ekki hafi verið staðið rétt að málum af okkar hálfu á einhvern hátt," segir Ögmundur. Íslensk stjórnvöld eiga að svara ESA, eftirlitsstofnun EFTA núna í fyrri hluta septembermánaðar. Ef ekki nást samningar við Breta og Hollendinga mun EFTA-dómstóllinn dæma um lagaskylduna en málsmeðferðartíminn þar er um sex mánuðir.

„Ég óttast ekki dómstólaleiðina fyrir mitt leyti en að sjálfsögðu, ef hægt er að ná ásættanlegum samkomulagi í þessari milliríkjadeilu, þá væri það mjög gott. Í þeim skilningi er ég bjartsýnn á málið og tel það vera í eðlilegum og heillavænlegum farvegi," segir Ögmundur.

Hvað væri ásættanlegur samningur? „Það ætla ég að leggja í mat þeirra sem sitja yfir þessum málum núna úti (í Hollandi innsk.blm). Svo vill maður fá að sjá þá niðurstöðu sem þeir koma með og heyra þeirra röksemdir. Ég held að menn eigi ekki að festa sig í eitt eða neitt í þeim efnum," segir Ögmundur.