Prófkjör óheppileg leið til að tryggja endurnýjun á lista

Prófkjör eru ekki heppileg aðferð til þess að bjóða upp á endurnýjun á lista og til þess að laða nýtt fólk inn í stjórnmálin, segir Magnús Árni Magnússon, forstöðumaður Félagsvísindastofnunar.

Prófkjör sjálfstæðismanna fyrir komandi borgarstjórnarkosningar fór fram í gær. Af þeim sem lentu í 10 efstu sætunum eru tveir sem hafa ekki starfað með borgarstjórnarflokki Sjálfstæðisflokksins áður, þau Geir Sveinsson og Hildur Sverrisdóttir. Þá fer prófkjör Samfylkingarinnar fram um næstu helgi og allir núverandi borgarfulltrúar flokksins gefa kost á sér.

„Það er ljóst að prófkjör, þó svo að þau séu upphaflega hugsuð til að bjóða upp á endurnýjum, að þá eru þeir sem eru fyrir alltaf í sterkari stöðu," segir Magnús Árni. Hann bendir á að í fyrsta lagi séu þeir þekktir, í öðru leyti hafi þeir í gegnum þátttöku sína í stjórnmálum komið sér upp neti stuðningsmanna sem að þeir virkji. „Fólk svona veit fyrir hvað þeir standa. Þannig að þeir eru óneitanlega alltaf í miklu sterkari stöðu nema að það sé kominn einhver ofboðslega mikill tími á þá," segir Magnús Árni

Magnús Árni bendir á að ræddar hafi verið hugmyndir um að koma á persónukjöri fyrir næstu kosningar. Þá gætu prófkjör hugsanlega verið úr sögunni. „En þá er bara sama staða uppi í kosningunum, að þeir sem eru þekktir eru bara í sömu stöðu og áður. Þetta er býsna vel valdað, þessi efstu sæti," segir Magnús Árni.