Segir nýtt vaktakerfi til bóta

Nýtt vaktafyrirkomulag hjá almennum læknum á Landspítalanum verður til bóta fyrir sjúklinga og læknanna sjálfa. Þetta segir Ólafur Baldursson, framkvæmdastjóri lækninga á spítalanum. Formaður félags almennra lækna segir hins vegar að flestir læknar séu mjög uggandi vegna breytinganna.

Í fréttum í gær var greint frá því að mikill urgur er í fjölda lækna eftir að stjórn Landspítalans ákvað að breyta vaktarfyrirkomulagi þar. Hjördís Þórey Þorgeirsdóttir, formaður Félags almennra lækna sem áður hét Félag ungra lækna, segir breytinguna geta orðið til þess að vinna þeirra aukist um allt að tuttugu prósent.

Ólafur Baldursson, framkvæmdastjóri lækninga á spítalanum, segir að vaktarfyrirkomulagið hafi verið útbúið eftir samræður við lækna og tillit hafi verið tekið til ábendinga þeirra. Því sé ætlað að koma til móts við sjúklinga.

Hjördís segir nær fullvíst að meirihluti almennra lækna á spítalanum muni mótmæla þessum breytingum. Hún sjái ekki annað en að með breytingunum á vaktarfyrirkomulaginu verði til þess að lög um hámarksvinnutíma verði brotin þótt stjórn spítalans fullyrði annað.

Ólafur bendir hins vegar á að þær vaktir sem nú eru hafa ekki verið alveg í samræmi við tilskipanir um vaktarfyrirkomulag. Nýtt fyrirkomulag sé það hins vegar og gæti þar með hagmuna læknanna. Launin skerðist ekki við breytinguna en viðvera á dagvinnutíma aukist aðeins.