Starfsfólk hannaði brospinna

Starfsfólk á geðsviði Landspítala hefur hannað brospinna sem seldir verða í þágu geðdeilda spítalans. Fyrstu pinnarnir voru afhentir Ástu Ragnheiði Jóhannesdóttur forseta Alþingis og Jóni Gnarr borgar­stjóra í gær.

„Notendur þjónustu geðsviðs Landspítala eru almennt ánægðir með hana,“ segir Páll Matthías­son, framkvæmdastjóri geðsviðsins.

„Þeir kvarta samt mjög oft undan því að húsgögn og húsmunir á legudeildum séu úr sér gengnir og lélegir. Við vitum þetta, en langvarandi aðhald í rekstri Landspítala hefur leitt til þess að fé hefur ekki verið aflögu til að bæta úr.“

Fyrirhugað er að selja brospinnann á alþjóðageðheilbrigðis­daginn 10. október og síðan áfram en ágóðinn mun óskiptur renna til að bæta umhverfi sjúklinga á geðdeildum Landspítala. Auk umbóta á legudeildum verður ágóðanum varið til styrktar iðjuþjálfun á geðdeildunum.

Brospinninn verður til sölu í Mjóddinni og í Kringlunni.-jss