Læknar sprengdu fjárlögin

Kostnaður Sjúkratrygginga Íslands vegna sérfræðilækna stefnir í að vera 37 prósentum hærri í ár en fjárlög gera ráð fyrir. Munurinn er 1.600 milljónir króna.

Ríkisendurskoðun segir að þó að Sjúkratryggingar nái að spara á ýmsum sviðum verði umframeyðslan 1.200 milljónir króna í ár enda verði kostnaður við sérfræðilækna 5.900 milljónir króna en ekki 4.300 milljónir eins og segir í fjárlögum.

Álfheiður Ingadóttir, fyrrverandi heilbrigðisráðherra, segir mikið hafa verið reynt að semja við sérgreinalækna um lækkun. „En því miður var það algerlega árangurslaust. Það var enginn vilji á þeim bænum til að taka þátt í því að koma Íslandi út úr þessu skuldafeni," segir Álfheiður.

Í svari til Ríkisendurskoðunar segir heilbrigðisráðuneytið að gott samstarf við sérfræðilækna hefði verið forsenda lækkunar enda hafi verið í gildi samningur við læknana.

Ríkisendurskoðun segir heilbrigðisráðuneytinu hafa verið fullljóst við fjárlagagerðina að áætlaður 3,9 milljarða sparnaður næðist ekki nema sérfræðilæknar féllust á að lækka gjaldskrá mjög mikið eða til kæmu kerfisbreytingar. „Krafa um að Sjúkratryggingar Íslands næðu fram nærri þriðjungs lækkun lækniskostnaðar án slíkra breytinga, skýrrar stefnumótunar og leiðsagnar ráðuneytisins var því algerlega óraunhæf," segir Ríkis­endurskoðun.

„Þetta er náttúrlega bara bull," segir fyrrverandi heilbrigðisráðherra. „Í fyrsta lagi er það Alþingi sem setti þessa sparnaðarkröfu á þjónustu sérfræðilækna. Í öðru lagi reyndi ráðuneytið ítrekað, og það ætti ríkisendurskoðanda að vera ljóst, að ná samkomulagi við sérgreinalækna um lækkun." - gar