Innleiðingu þriðja dómstigsins flýtt

Eining var meðal dómara og lögmanna á málþingi í gær um að koma beri á þriðja dómstiginu hið fyrsta. Ögmundur Jónasson dómsmálaráðherra segir málið komið á ákvörðunarstig.

„Lögmannasamfélagið og talsmenn dómkerfisins eru á einu máli um nauðsyn þess að reyna að flýta því að koma á þriðja dómstiginu. Ég tók undir þessar hugmyndir,“ segir Ögmundur, sem kveðst þó hafa undirstrikað að horfa yrði til þess hvort hagræðing fælist í framkvæmdinni.

„Ég tók undir það að komið yrði á þriðja dómstiginu og að framkvæmd yrði hraðað ef tækist að sýna fram á að þannig nýttust fjármunir betur en ef gripið yrði til skyndilausna frammi fyrir þeim vaxandi og miklu verkefnum sem dómskerfið stæði frammi fyrir af völdum efnahagshrunsins,“ segir ráðherrann.

Að sögn Ögmundar sammæltust þinggestir um það eftir yfirlýsingu hans að fara í þá vinnu að leggja fram hugmyndir. „Ég get sagt það fyrir mína parta að ég mun taka vel slíkri tillögusmíð og vil að sem flestir hagsmunaaðilar innan kerfisins komi að því, þannig að við fáum hið fyrsta vissu um hvort við viljum fara þessa braut. Ég teldi það mjög æskilegt og fagna þeirri eindrægni sem er með lögmönnum og dómurum um þetta,“ segir dómsmálaráðherra. - gar