Björn Zoëga: Ekkert samráð við spítalann um niðurskurð

Forstjóri Landspítalans segir að ekki sé búið að meta áhrif boðaðs niðurskurðar á landsbyggðinni á spítalann. Ekkert samráð var haft við Landspítalann um tillögurnar.

Boðaður niðurskurður á heilbrigðisþjónustu út á landi hefur valdið miklum titringi. Spurningar vakna um það hvort önnur sjúkrahús ráði við fjölgun á sjúklingum og aukið álag.

Björn Zoega er forstjóri Landspítalans.

„Landspítalinn ræður við meira vinnuframlag, en það er þá spurning hvort við þurfum ekki meiri pening, við þurfum allavegana að endurskipuleggja okkur ef mikið af verkefnum verða flutt til okkar," segir Björn.

Aðspurður hvort búið sé að meta hvaða áhrif þetta hefur fyrir Landspítalann svarar Björn:

„Nei, það er ekki búið að því ennþá, en mér skilst að sú vinna sé í gangi og það eigi eftir að ræða við stofnanir út á landi hvað þær geta gert fyrir þann pening sem þær fá og hvað ekki."

Björn segir að ekkert samráð hafi verið haft við spítalann um tillögurnar.

„Þetta hefur oft verið skoðað heildstætt fyrir landið. Það eru til skýrslur þar sem þetta hefur verið metið hagkvæmt og einhver svona leið, en akkúrat núna í sumar eða vor þá hefur þetta ekki verið rætt við landspítalann," segir Björn.