Móðir neitaði fyrirtæki að gera markaðsrannsóknir á syni sínum

„Það var hringt og spurt um leyfi til þess að tala við son minn," segir móðir tólf ára gamals drengs en Capacent-Gallup hafði samband við hana og vildi gera markaðsrannsóknir á drengnum í vikunni.

Móðirin, sem vildi ekki koma fram undir nafni, sagði í samtali við Vísi að kurteis ung kona hefði hringt og beðið formlega um leyfi til þess að ræða við son hennar.

Konan útskýrði erindi sitt lauslega og sagði tilganginn að spyrja hann nokkurra spurninga vegna markaðsmála.

Móðirin gaf konunni ekki leyfi til þess að spyrja drenginn þessara spurninga, sem snérust meðal annars um það hvar hann keypti gallabuxur.

„Mér fannst þetta mjög einkennilegt," segir móðirin sem hafði í kjölfarið samband við Capacent-Gallup sem gekkst við rannsókninni. Hún fékk þó ekki að vita hver stóð á bak við könnunina en var lofað frekari svörum um það sem hún hefur ekki fengið.

Oddfríður Steindórsdóttir, leikskólastjóri á Hlíðarenda í Hafnarfirði, sagði frá því í vikunni í fréttum Stöðvar 2 að ásælni fyrirtækja í leikskólabörn væri talsverð.

Bankar bjóði börnunum í heimsókn, væntanlega með það að markmiði að breyta þeim í neytendur, hliðholla bönkunum, í framtíðinni. Hún sagði ennfremur að leikskólinn afþakkaði mörg boð sem bærust til þeirra.

RÚV ákvað á síðasta ári að hætta birtingum auglýsinga í kringum barnaefni sjónvarpsins fyrir klukkan 18:00 á daginn. Sú ákvörðun er alfarið ákvörðun stjórnar RÚV ohf.