Bréf til bænda frá gömlum Mýramanni

Gott og náið samstarf við bændur og forystu þeirra telur Össur Skarphéðinsson utanríkisráðherra forsendu þess að hagur þeirra verði sem tryggastur gegnum viðræðurnar um aðild Íslands að Evrópusambandinu (ESB). „Staðreyndin er einfaldlega sú, að samningsstaða íslensks landbúnaðar er betri en þeir telja, sem ekki vilja láta á hana reyna,“ segir í bréfi Össurar í Bændablaðinu á fimmtudag, svari við bréfi Bændasamtakanna til hans.

„Ég ber fulla virðingu fyrir skoðunum þeirra, sem eru á móti aðild. Ef það verður niðurstaða í þjóðar­atkvæðagreiðslu að hafna samningi, þá tek ég því einsog þegar svartbakurinn barði mig á Mýrunum í gamla daga,“ segir Össur, en segir um leið að óráð væri að draga umsókn Íslands til baka.

Hann segir menn verða að ráða því hvort þeir séu að óséðum samningi með eða á móti aðild, en brýnir um leið fyrir þeim sem hagsmuna eiga að gæta, að gera ráð fyrir þeim möguleika að samningur verði á endanum samþykktur. „Þá mun mestu skipta fyrir bændur að okkur hafi tekist að vinna saman að því að samningurinn sé sem bestur,“ segir Össur. - óká