Depp þakkar Brando fyrir ferilinn

Johnny Depp þakkar Marlon Brando fyrir góð ráð og að hafa raunar lagt grunninn að ferli hans, í viðtali við breska blaðið The Sun. Brando og Depp léku saman í tveimur myndum, Don Juan og The Brave, en það er fyrsta og eina kvikmyndin í fullri lengd sem Depp hefur leikstýrt. Þeir urðu miklir vinir og Brando leiddi hann í allan sannleika um hvernig væri best að ná árangri í Hollywood.

„Hann spurði mig hvað ég léki í mörgum myndum á ári. Og þá var ég að gera þrjár á hverju ári. Hann sagði að það væri of mikið, við ættum ekki svo mörg andlit í pokahorninu,“ segir Depp, sem hefur um árabil verið einn fremsti karlleikari kvikmyndaborgarinnar og um leið sá sérvitrasti, eins og Brando.

Depp segist einnig í viðtalinu ekki líta á sig sem stórstjörnu, hann geti ekki hugsað um sig sem slíka. Hann viðurkennir hins vegar að honum hafi gengið vel en um helgina verður kvikmyndin The Tourist frumsýnd þar sem Depp leikur á móti Angelinu Jolie. Miklar vonir eru bundnar við myndina enda ekki á hverjum degi sem slíkar stórstjörnur leiða hesta sína saman.

„Angelina er frábær og það er virkilega gaman að vinna með henni, hún er klár og hefur ákaflega skemmtilegan og skrítinn húmor,“ segir Depp um mótleikkonu sína.