Leiðindaskjóða fékk á kjaftinn

Tveir sextán ára piltar voru handteknir í Reykjavík í fyrrinótt eftir að hafa látið dólgslega og ógnað vegfarendum. Piltarnir heimtuðu fjármuni og áfengi af fólki sem þeir mættu á förnum vegi. Annar þeirra var vopnaður hnífi sem lögreglan lagði hald á.

Þá voru átta líkamsárásir tilkynntar til lögreglunnar um helgina. Sjö þeirra áttu sér stað í miðborginni aðfaranætur laugardags og sunnudags. Þessar árásir áttu sér stað ýmist á eða við skemmtistaði en líkamsárásirnar voru allar minniháttar.

Í einu tilviki var um að ræða líkamsárás í samkvæmi í heimahúsi í miðborginni. Lögreglan hefur það eftir sjónarvottum að þar hafi ónefndur gestur fengið á kjaftinn eftir að hafa verið til mikilla leiðinda.