Fagurgrænn og umdeildur og Jón Gnarr veit ekki hvað hann á að gera við hann

 

Hjólreiðamenn nýta sér ekki hjólreiðastíginn við Hverfisgötu því þeir telja öruggara að ferðast hinum megin við götuna. Íbúar við Hverfisgötu hafa lagt bílum sínum við stíginn og þá hafa þeir kvartað yfir stígnum og þeim bílastæðum sem tekin voru í burtu.

Sú ákvörðun umhverfis- og samgönguráðs að leggja þennan fagurgræna hjólreiðastíg við Hverfisgötuna grundvallaðist af góðum ásetningi. Að efla mannlíf í miðborginni og hvetja til aukinna hjólreiða. Um er að ræða tilraunaverkefni, en svo virðist sem það hafi ekki heppnast alveg nægilega vel, því mikil óánægja er með stíginn auk þess sem hjólreiðamenn virðast ekki nota hann í miklum mæli. Auk þess virðast bifreiðaeigendur láta eins og hann sé hreinlega ekki til staðar og leggja bílum sínum á stíginn.

Hjólreiðamenn sem fréttastofa ræddi við sögðu að meira öryggi væri fólgið í því að hjóla hinum megin við götuna, við gangstéttina, því hjólreiðastígurinn tæki enda sem þýddi að menn færu í miðri umferð við lok stígsins. Það virtist þó ekki trufla þessa stúlku.

Til lítils ef enginn vill hjóla á stígunum

En stendur til að færa stíginn? „Við settum þetta upp í sumar í tilraunaskyni og það hafa verið nokkur vandkvæði. Bæði hefur fólk lagt bílunum sínum á hjólreiðastíginn og síðan hafa íbúar kvartað yfir því að það sé búið að taka stæði. Ein hugmynd, sem ég veit ekki hvort að komi til framkvæmda, er að flytja hjólreiðastíginn hinum megin við götuna. Svo þarf að fylgjast með því hversu margir nota þetta. Það væri hægt að hafa hjólreiðastíga hér um alla borg, en það væri til lítils ef enginn vildi hjóla á þeim. Þannig að, ég veit ekki alveg hver framtíð hjólreiða á Hverfisgötu verður," segir Jón Gnarr, borgarstjóri.