Stefán: Reyndi að keyra á vin minn og tvo hunda

„Maðurinn gerði þetta viljandi. Hann bakkaði bílnum áður en hann lagði til atlögu svo hann kæmist hraðar og reynir að keyra á vin minn og báða hundana," segir Stefán Már Guðfinnsson hundaeigandi í samtali við Vísir.is.

Ekið var á hund í Elliðaárdalnum aðfaranótt mánudags. Samkvæmt fréttum á bílstjórinn að hafa sagt lögreglu að þetta hafi verið slys.

Stefán segir að hundurinn sé fótbrotinn. "Hundurinn var heppinn að lenda á milli dekkjanna á bílnum, hann lenti á grillinu á bílnum," segir hann.

Samkvæmt fyrstu fréttum var hundurinn að atast í villtum kanínum. Téður ökumaður átti að hafa reynt að stöðva hundinn en ók utan í hundinn.



„Það var ekkert hundaat þarna," segir Stefán.

Stefán og vinur hans voru á gangi í Elliðaárdalnum með tvo hunda. Annar hundurinn var laus. "Það voru kanínur þarna en við vorum ekkert að siga hundinum á þær. Hundar eru bara hundar.  Ég veit ekkert hvort minn var að elta kanínur. Það eru fleiri með hunda heldur en við," segir hann.

Umræddur ökumaður kemur gangandi til mannanna og kallar að sögn Stefáns  til þeirra: „Helvítis fantar!" Stefán segir að vinirnir hafi haldið göngunni sinni áfram og telur að ökumaðurinn sé í kringum fertugt.

Þegar þeir koma að bílnum sínum er maðurinn þar.

„Hann beið eftir okkur við bílinn. Svo hleypur hann í sinn bíll og öskrar: Ég er með númerið hjá ykkur, ég mun ná til ykkar. - Svo öskraði hann eitthvað meira sem ég náði ekki. Þá tek ég upp spýtu því ég vissi ekki hvað ég átti að halda. Og þá bakkar hann bílnum, keyrir áfram og reynir að keyra á vin minn og báða hundana," segir Stefán.

Spurður hvort hann kærði ökumanninn í dag líkt og móður hans hafði sagt við vísir.is sagði hann að það verði gert á morgun.

„Nei, ég náði því ekki fyrir fjögur. Ég vaknaði svo seint. Ég kæri hann á morgun."