Þriðja húsleitin hjá LOGOS - einn með réttarstöðu grunaðs manns

Sérstakur saksóknari gerði húsleit hjá LOGOS í morgun en það er í þriðja skiptið á einu ári sem embættið sér ástæðu til þess að leita í húsakynnum lögfræðistofunnar.

Fyrsta húsleitin var framkvæmd í júní á síðasta ári. Þá gerðu fulltrúar á vegum sérstaks saksóknara húsleit hjá LOGOS í Efstaleiti. Þá var einnig gerð húsleit hjá hýsingaraðila rafrænna gagna hjá LOGOS.

Ástæðan fyrir húsleitinni var rannsókn sérstaks saksóknara á kaupum sjeiksins Al Thani á 5 prósentu hlut í Kaupþingi. Einn lögmanna LOGOS, Guðmundur Oddsson, sat í stjórn Q Iceland Finance sem var í eigu Al Thani þegar viðskiptin áttu sér stað. Grunur leikur á um stórfellda markaðsmisnotkun.

Stuttu eftir þá húsleit var aftur ráðist í húsleit hjá LOGOS, nú var það efnahagsbrotadeild ríkislögreglustjóra sem sá um húsleitina. Rannsókn efnahagsbrotadeildarinnar beinist að meintu ólöglegu fimm milljarða króna láni FL Group til athafnamannsins Hannesar Smárasonar, fyrrum forstjóra félagsins.

Talið er að lánið hafi verið notað til kaupa á Sterling-flugfélaginu árið 2005. Þá var einnig til rannsóknar hvort Hannes hefði orðið uppvís af umboðssvikum.

Gunnar Sturluson, faglegur framkvæmdastjóri LOGOS, hefur fengið réttarstöðu grunaðs manns í rannsókn efnahagsbrotadeildar á hugsanlegum skattalagabrotum eignarhaldsfélaga tengdum Hannesi Smárasyni. Gunnar hefur meðal annars verið yfirheyrður vegna málsins.

Þriðja húsleitin var svo framkvæmd í morgun. Nú er það mál tengt Exista og Bakkavör. Forsvarsmenn Exista hafa verið kærðir til sérstaks saksóknara en þeir eru meðal annars grunaðir um skilasvik. Nýi Kaupþing kærði forsvarsmenn Exista til sérstaks saksóknara vegna sölu á hlut Exista í Bakkavör Group þann 11. september síðastliðinn.

Þá kærði Nýi Kaupþing einnig þá starfsmenn Deloitte og Logos lögmannsþjónustu sem önnuðust tilkynningu til hlutafjárskrár vegna hlutafjáraukningar Exista í desember 2008.

Á heimasíðu stofunnar segir að LOGOS reki sögu sína allt til ársins 1907 þegar Sveinn Björnsson opnaði fyrstu málflutningsskrifstofu landsins.

Svo segir orðrétt: „Á þeim hundrað árum sem liðin eru hefur mjög margt breyst. Þau grunngildi sem þessi athafnasami lögmaður, og síðar forseti, hafði að leiðarljósi eru þó enn óbreytt. Heiðarleiki, fagmennska og metnaður og af þeim grunni rís velgengni LOGOS."