Seltirningar breyta skipuriti

Meirihluti bæjarstjórnar Seltjarnarnesbæjar samþykkti á bæjarstjórnarfundi á dögunum tillögu ráðgjafafyrirtækisins Capacent um nýtt skipurit yfirstjórnar sveitarfélagsins.

Meirihlutinn, sem sjálfstæðismenn skipa, „telur rétt að við þær breyttu og erfiðu efnahagsaðstæður sem sveitarfélög á Íslandi búa nú við sé nauðsynlegt að leita allra leiða til þess að draga úr kostnaði við rekstur bæjarfélagsins," segir í tilkynningu frá bænum.

Fimm stöður lagðar niður

Þá segir að undanfarna mánuði hafi markvisst verið unnið að því að draga úr kostnaði á ýmsum rekstrarsviðum til að mæta minnkandi tekjum, en standa þess í stað vörð um gunnrekstur eins og t.d. skóla-, umhverfis- og öldrunarmál. „Fimm stöður framkvæmdastjóra mismunandi sviða bæjarins verða lagðar niður í sparnaðar- og hagræðingarskyni."

Einnig hefur verið samþykkt að starfsemi sveitarfélagsins verði skipt í a.m.k. sex verkefnasvið í nýju stjórnskipulagi fyrir sveitarfélagið sem fyrsta áfanga í að taka upp flatt stjórnskipulag og verða þær stöður auglýstar. „Nýtt stjórnskipulag, sem tekur formlega gildi 1. október nk., miðar að því að færa uppbyggingu og virkni stjórnskipulags sveitarfélagsins nær fyrri uppbyggingu þess og því sem almennt gildir hjá sveitarfélögum af sambærilegri stærð utan höfuðborgarsvæðisins. Sú nálgun er mun heppilegri viðmiðun en við sveitarfélög á höfuðborgarsvæðinu, sem eru bæði stærri en Seltjarnarnesbær og eiga auk þess verulega stækkunarmöguleika öfugt við Seltjarnarnesbæ. Þar búa nú hátt í 5000 manns."

Að lokum segir að tillagan miði að því að hafa skipulagið eins einfalt og kostur er, „að allar boðleiðir séu eins stuttar og frekast er unnt án þess að einstökum starfsmönnum sé ætlað um of."