Breyttur miðbær er á umræðustigi

„Allt er þetta svolítið í höndum Strætós enn þá,“ segir Karl Sigurðsson, borgarfulltrúi Besta flokksins og formaður umhverfis- og samgönguráðs Reykjavíkur. Strætó bs. kynnti í gær hugmyndir sem miða að því að færa skipti- og endastöð vagna frá Hlemmi að BSÍ og breyta akstri um miðborg Reykjavíkur.

Karl segir Strætó munu vinna málið áfram, svo sem fara í kostnaðargreiningu og komi til þess, samningaviðræður við Kynnisferðir sem eiga BSÍ. „En þessu var mjög vel tekið í okkar ráði og okkur þóttu þetta frábærar hugmyndir sem þeir eru með.“

Að sögn Karls var í kynningu Strætós í gær lögð áhersla á að fara yfir þá möguleika sem í stöðunni eru og kosti við breytingarnar. „En við fórum ekki út í útfærsluna, ena í raun ekki í okkar höndum að gera samning við BSÍ fyrir Strætó.“ Þá var ekki heldur farið yfir mögulegan kostnað vegna breytinganna.

Karl segir hins vegar að áfram verði skoðuð hugmynd um að gera Lækjargötu að „samrými“ þar sem blandað verður saman akandi, hjólandi og gangandi umferð.

„Sú hugmynd er komin frá sjálfstæðismönnum í umhverfis- og samgönguráði og henni var vel tekið á fundinum.“ Breytingar á miðbæjarakstri Strætós segir hann geta fallið vel að slíkri breytingu, enda myndi þá draga verulega úr umferðarhraða í Lækjargötu.- óká