Flestir sleppa við að borga skatt af lánaleiðréttingu

Fólk mun ekki þurfa að greiða skatt af leiðréttingu bíla - og íbúðalána - nema þeir einstaklingar sem hafa fengið yfir tíu milljónir króna afskrifaðar, og þau hjón sem hafa fengið yfir 20 milljónir króna niðurfelldar. Þetta kemur fram í frumvarpi sem fjármálaráðherra mælir fyrir á Alþingi í dag.

Um er að ræða breytingar á lögum um tekjuskatt og skattalega meðferð á eftirgjöf skulda. Ákvæðin eru til bráðabirgða og ná til tekjuáranna 2009, 2010 og 2011. Samkvæmt frumvarpinu er í stað fullrar tekjufærslu á eftirgjöf skulda heimilt að telja ekki til tekna allt að samtals 10 milljónir króna hjá einstaklingi og samtals 20 milljónir hjá hjónum eða samsköttuðum vegna greiðsluerfiðleika á áðurnefndu tímabili.

Ef niðurfelling skulda fer fram úr þessum fjárhæðum má falla frá tekjufærslu sem nemur helmingi af eftirgjöfinni að hámarki samtals 20 milljónum króna hjá einstaklingi og 40 milljónum hjá hjónum.

Í athugasemdum við frumvarpið segir að miðað við þær upplýsingar sem liggi fyrir um skuldastöðu heimilanna kæmi í langflestum tilvikum ekki til neinnar skattskyldu vegna leiðréttingar og eftirgjafar á skuldum. Þetta á jafnt við um skuldir vegna húsnæðis - og bílakaupa.

Í frumvarpinu er tekið dæmi um hjón með gengistryggt lán sem stendur í 100 milljónum króna vegna fasteignar sem metin er á 40 milljónir króna. Miðað við 110% leið bankanna, gæti eftitgjöf viðskiptabanka hjónanna numið 56 milljónum króna. Hluti af þessari eftirgjöf teldist skilmálabreyting og hluti niðurfelling. Verði frumvarpið óbreytt að lögum þyrftu áðurnefnd hjón að greiða skatt af um það bil 3 milljónum króna. Heimilt er að fresta skattlagningu um tvö ár og að þeim tíma liðnum er hægt að dreifa skattgreiðslum á fimm ár. Árlegur tekjuskattur og útsvar yrði þannig 240 þúsund krónur á fimm árum.