Notendum dv.is bent á að skanna tölvur sínar vegna vírusa

Heimasíða DV varð fyrir fólskulegri árás síðdegis í gær þegar tölvuþrjótar réðust á vefinn. Þeir virðast hafa nýtt sér veikleika í hugbúnaði á vefþjóni sem notaður var til að birta auglýsingar á vefnum.

Í tilkynningu frá DV er þeim, sem fóru inn á vefinn dv.is á milli kl.17:40 í gær og 11:50 í morgun og vilja gæta fyllstu varúðar vegna vírussmits, bent á að skanna tölvur sínar með aðstoð vírusvarna. Hugsanlegt er að tölvuþrjótarnir hafi reynt að koma eins konar niðurhalsveiru fyrir á vefþjóni DV.

Þeim notendum, sem eru með Windows XP, Windows Vista eða Mac OS og hafa ekki sett inn nýjustu öryggisuppfærslur, er ráðlagt að keyra veiruskanna til öryggis. Veiran hefur ekki áhrif á Windows 7. DV vill benda á eftirtalda veiruskanna sem hægt er að sækja á vefinn án endurgjalds:

Windows Live OneCare safety scanner http://onecare.live.com/site/en-US/default.htm

Fjölmargir notendur hafa í dag orðið varir við viðvaranir frá vöfrum sínum þegar þeir reyndu að fara inn á vefinn DV.is og jafnvel þegar farið var inn á síður með tenglum sem vísuðu inn á vef DV.is.

Þessi skilaboð berast vegna öryggisviðbragða viðkomandi vafra, sem fóru í gang eftir að veirunnar varð fyrst vart og eru ekki hættuleg í sjálfu sér. Þeirri öryggisskráningu verður breytt um leið og staðfesting berst til viðkomandi vafra um að viðgerð sé lokið og komið hafi verið í veg fyrir að þetta endurtaki sig.

Staðfest hefur verið að þrjótarnir komust ekki inn í tölvur ritstjórnar DV og þær hafa ekki orðið fyrir vírussmiti.