Ögmundur hefur ekki ákveðið hvort hann afþakkar ráðherralaun

Ögmundur Jónasson hefur ekki tekið ákvörðun um hvort hann ætli að afsala sér launum ráðherra líkt og hann gerði þegar hann gegndi embætti heilbrigðisráðherra. „Ég hef ekki tekið neina ákvörðun í því efni," segir Ögmundur sem tók í dag við sem samgöngu- og sveitarstjórnarráðherra og dómsmála- og mannréttindaráðherra.

Í tengslum við niðurskurð innan heilbrigðiskerfisins tilkynnti Ögmundur í mars 2009 að hann hefði ákveðið að þiggja ekki ráðherralaun á meðan núverandi ríkisstjórn sæti. Ögmundur þáði því þingfararkaup fyrir störf sín sem ráðherra og þingmaður þá mánuði sem hann gegndi embætti heilbrigðisráðherra.

„Ég mun eiga það við sjálfan mig," segir Ögmundur aðspurður hvort það muni skýrast á næstu dögum hvort hann afsali sér launum sem ráðherra.