Gagnrýnir fyrirætlanir um skattahækkanir

Ríkisstjórnin áformar enn að ráðast í skattahækkanir í haust, á þeim tíma sem ríki allt í kringum okkur eru að fara í þveröfuga átt, sagði Sigmundur Davíð Gunnlaugsson, formaður Framsóknarflokksins, á Alþingi í dag. Hann sagði að ekki væri horft til þess að búa til aðstæður þar sem verðmætasköpun verði meiri.

Sigmundur Davíð sagði að ríkisstjórninni hefði verið forðað frá því að gera hrikaleg mistök með því að samþykkja Icesave skuldbindingarnar. Viðsnúningurinn í efnahagslífi landsins hefði meðal annars náðst á þessum forsendum. Sparnaðurinn sem hefði hlotist af því að samþykkja ekki Icesave skuldbindingarnar væri líklegast tvöfaldur á við allar aðgerðir ríkisstjórnarinnar í ríkisfjármálum.

Sigmundur Davíð sagði að á hverjum degi flytti ein íslensk fjölskylda á dag til Noregs auk þeirra sem flyttu til annarra ríkja. Þetta ylli því að atvinnuleysistölur væru ekki hærri en raun bæri vitni. Hins vegar væri rangt að tala um að atvinnuleysi væri á undanhaldi.