Einoka aðgang að ljósleiðara

Upplýsingatækni Míla vinnur gegn markmiðum ríkisins um samkeppni á fjarskiptamarkaði með því að meina Vodafone um aðgang að ljósleiðarahringtengingu um landið. Þetta er mat Vodafone sem fengið hefur afhentan frá utanríkis­ráðuneytinu einn af átta ljósleiðaraþráðum í svokölluðum NATÓ-ljósleiðara sem Varnarmálastofnun hafði áður umráð yfir.

Varnarmálastofnun bauð út tvo ljósþræði í kaplinum árið 2008 og var gengið til samninga við fjarskiptafélögin Fjarska og Vodafone.

Í apríl á þessu ári var gengið frá samningi milli Vodafone og Varnarmálastofnunar og hefur utanríkisráðuneytið formlega afhent fyrirtækinu téðan ljósleiðaraþráð. Samkvæmt upplýsingum frá Vodafone hefur fyrirtækið lagt í tugmilljónakostnað til þess að tengjast strengnum á nærri 40 tengistöðvum víða um land, en er neitað um aðgang af hálfu Mílu.

„Míla hefur engar lagalegar forsendur fyrir því að hafna okkur um aðgang að sinni aðstöðu, svo Vodafone geti komið umræddum ljósþræði í rekstur. Eina markmið Mílu er að draga málið á langinn og hamla gegn samkeppni með ólögmætum hætti," segir Hrannar Pétursson upplýsingafulltrúi Vodafone og vísar til fyrri úrskurða Póst- og fjarskiptastofnunar (PFS) sem sýni að Mílu sé skylt að veita slíkan aðgang.

PFS hafnaði því 25. ágúst síðastliðinn að kveða upp bráðabirgðaúrskurð í deilumáli fyrirtækjanna. Hrafnkell V. Gíslason, forstjóri PFS, segir málið fara í hefðbundinn farveg innan stofnunarinnar þar sem leitað verði andsvara við umkvörtunum. Alla jafna ætti ekki að taka meira en þrjá mánuði að leiða svona mál til lykta, en við taki svo hefðbundnar kæruleiðir.

Hrannar bendir á að einn megin­tilgangur PFS sé að tryggja samkeppni á fjarskiptamarkaði. „Við treystum því að stofnunin taki það hlutverk sitt alvarlega og vinni málið hratt."

Ekki náðist í forsvarsmenn Mílu í gær. Míla er í eigu Skipta, sem einnig á Símann og fleiri fyrirtæki. - óká / sjá síðu 10