Þing kemur saman í dag

Alþingi kemur saman i dag að loknu sumarleyfi. Þingfundur hefst klukkan hálftvö með því að Benedikts Gröndals, fyrrverandi forsætisráðherra og þingmanns, verður minnst, en hann lést í sumar.

Að því loknu mun Jóhanna Sigurðardóttir forsætisráðherra flytja þinginu skýrslu sína um störf og stefnu ríkisstjórnarinnar.

Klukkan hálftólf í dag verður haldinn ríkisráðsfundur á Bessastöðum þar sem breytingar á ríkisstjórn fara fram. Enn hefur ekkert fengist staðfest um það hverjir taka við ráðherraembættum og hverjir láta af embætti. Líklegast þykir þó að Ögmundur Jónasson og einhver þingmaður Samfylkingarinnar setjist í stól ráðherra og að Kristján Möller og Álfheiður Ingadóttir hætti sem ráðherrar.

Þá er gert ráð fyrir að starfshópur um framtíðarsjávarútvegsstefnu muni skila af sér 300 blaðsíðna skýrslu um framtíð sjávarútvegsstefnunnar.