Loforð um lýðræðisumbætur ekki verið efnd

Þór Saari, þingmaður Hreyfingarinnar, sagði við umræður á Alþingi í dag að loforð um lýðræðisumbætur sem gefnar hefðu verið í aðdraganda alþingiskosninganna á síðasta ári hefðu verið svikin.

Benti hann á að frumvarp sem lagt hefði verið fram um þjóðaratkvæðagreiðslur hafi ekki náð að ganga. Þá hafi frumvarp Hreyfingarinnar um fjölgun í sveitastjórnum ekki náð fram að ganga. Hann sagði að ein meginástæðan fyrir þessu væri sú að þingmenn hugsuðu ævinlega fyrst um sjálfa sig, þá flokkinn sinn, en síðan um almenning.

Þór sagðist hins vegar binda miklar vonir við stjórnlaganefnd og fyrirhugaðan þjóðfund og stjórnlagaþing. Hins vegar væri brýnt að niðurstaða stjórnlagaþingsins færi umsvifalaust í þjóðaratkvæðagreiðslu að þinginu loknu.