Óvíst hvern Jóhanna velur

Óvissa ríkti um það í gærkvöldi hver kæmi nýr inn í ríkisstjórn fyrir hönd Samfylkingarinnar. Ögmundur Jónasson verður nýr ráðherra Vinstri grænna en úr Samfylkingunni eru nöfn Guðbjarts Hannessonar og Oddnýjar G. Harðardóttur helst nefnd.

Formenn stjórnarflokkanna munu kynna þingflokkum sínum tillögur að nýjum ráðherralistum klukkan níu í fyrramálið. Í kjölfarið mun flokksstjórn Samfylkingarinnar funda um málið.

Ríkisráðsfundur verður haldinn á Bessastöðum klukkan tólf þar sem nýir ráðherrar taka við af þeim gömlu. Ljóst er að Ragna Árnadóttir og Gylfi Magnússon munu hverfa úr stjórninni, og líklega einnig Kristján L. Möller og Álfheiður Ingadóttir.

Rætt er um að Ögmundur Jónas­son taki við nýju innanríkisráðuneyti, Árni Páll Árnason verði annaðhvort velferðarráðherra eða efnahags- og viðskiptaráðherra og hinn nýi ráðherra Samfylkingar fái það sem ekki fellur Árna Páli í skaut. Um þessa fléttu var enn óvissa í gærkvöldi. - sh