Efnahagsbatinn ytri skilyrðum og fyrri ríkisstjórn að þakka

Þau jákvæðu teikn sem eru á lofti í efnahagslífinu eru vegna ytri skilyrða og stefnumörkunar fyrri ríkisstjórnar, sagði Bjarni Benediktsson, formaður Sjálfstæðisflokksins, á Alþingi í dag. Hann benti á að verðbólga væri á undanhaldi vegna þess að jafnvægi væri að komast á gengi krónunnar. Útflutningsaðilar hafi staðið sterkt að undanförnu vegna lágs gengis krónunnar.

Hins vegar hafi aðgerðir ríkisstjórnarinnar haft þveröfug áhrif. Benti Bjarni þar meðal annars á skattahækkanir ríkisstjórnarinnar. Þær hafi íþyngt atvinnulífinu. „Þess vegna er það algjört glapræði að ætla að setja þær á dagskrá enn á ný," sagði Bjarni. Hann sagði að hagvöxtur yrði byggður upp með því að sjá fyrirtækjum í landinu fyrir góðum skilyrðum, lækkun vaxta og afnám gjaldeyrishafta.

Bjarni skammaðist yfir því að ríkisstjórnin hafi fælt frá erlenda fjárfesta á sviði orkumála. Ríkisstjórnin yrði að marka sér stefnu í málinu.