Barnaníðingurinn var einn af stofnendum Fáfnis

Karlmaðurinn, sem var dæmdur í tveggja og hálfs árs fangelsi fyrir að misnota tvær unglingsstúlkur á meðferðarheimilinu Árbót í Aðaldal, kveðst vera einn af stofnendum vélhjólaklúbbsins Fáfnis sem í dag heitir Hells Angels.

Maðurinn, sem er tæplega fertugur, hótaði meðal annars annarri stúlkunni með því að taka sérstaklega fram að hann þekkti marga úr Fáfni.

Fyrir dómi sagði stúlkan, sem þá var sextán ára, að hún hafi ímyndað sér að hann myndi láta drepa hana ef hún segði frá sambandi þeirra. Tengslin hafi valdið henni ótta.

Maðurinn var dæmdur í Héraðsdómi Norðulands eystra í gær fyrir að láta tvær stúlkur á meðferðarheimiliu Árbót hafa við sig munnmök. Þá hafði hann kynferðismök við aðra þeirra.

Hann var sjálfur starfsmaður á Árbót þegar brotin voru framin. Í vitnisburði annarrar stúlkunnar kemur fram að maðurinn hafi alltaf verið að tala um að hann hefði verið í Fáfni á Íslandi. Þess vegna hafi hún fundið til ótta auk þess sem hún hefði lent áður í svipuðum aðstæður, það er að segja misnotkun, og henni fannst hún upplifa þær aðstæður aftur.

Maðurinn sagði fyrir rétti að hann hefði verið einn af stofnendum Fáfnis en hann hafi hætt í vélhjólaklúbbnum fyrir níu árum síðan þar sem honum þótti hann þróast í átt sem honum hugnaðist ekki.

Eins og kunnugt er þá er Fáfnir nú í formlegum tengslum við Vítisenglanna á Norðurlöndunum en Ríkislögreglustjóri skilgreinir þann klúbb sem alþjóðleg glæpasamtök.

Þess má geta að maðurinn hafði hreinan sakaferil.

Dómurinn yfir manninum er óskilorðsbundinn. Honum er einnig gert að greiða stúlkunum tæplega tvær milljónir samanlagt í miskabætur.