Breytingar á strætóferðum vegna kvennafrídagsins

Breytingar verða gerðar á akstri Strætó á morgun þegar að kvennafrídagurinn verður haldinn hátíðlegur. Búist er við að talsverður fjöldi fólks sæki hátíðahöldin og götum verður lokað í miðbæ Reykjavíkur vegna þeirra.

Mestar verða breytingarnar á leið 14, þar sem Kalkofnsvegi verður lokað frá 13:30 vegna frágangs á sviði. Leið 14 mun því frá klukkan 13:30 aka um Ánanaust, Hringbraut, Suðurgötu Skothúsveg, Fríkirkjuveg, Vonarstræti, Suðurgötu og Hringbraut á leið á Hlemm og sömu götur til baka þegar keyrt er að Granda.

Allir aðrir vagnar munu aka samkvæmt hefðbundinni áætlun fram til kl. 15:00, en þá verður Hverfisgötu lokað. Akstur verður þá með sama hætti og 17. júní og verða lokaðar biðstöðvar merktar og vísað á næstu opnu biðstöð. Strætó mun jafnframt bæta við aukavögnum á leiðum 1, 3 og 6 fyrir heimferð hátíðargesta. Biðstöðvar á leið úr bænum út í hverfi eru aðgengilegastar úr Vonarstræti (Ráðhúsinu) og frá Hlemmi. Leið 13 mun aka óbreytt um Vonarstræti í báðar áttir.

Leiðir sem aka um Hverfisgötu og Lækjargötu munu eftir kl.15:00 aka frá Hlemmi um Snorrabraut, gömlu Hringbraut, Sóleyjargötu, Fríkirkjuveg, Vonarstræti, Suðurgötu, Hringbraut og þaðan út í hverfi.

Á leið að Hlemmi er ekið um Suðurgötu Skothúsveg, Sóleyjargötu, gömlu Hringbraut og Snorrabraut.

Greiðsla fargjalda er hefðbundin eins og venjulega.