Þúsund manns í Viðey á Hátíð Hafsins

Þeir viðburðir sem skipulagðir hafa verið í Viðey það sem af er sumri hafa verið afskaplega vel sóttir og voru um þúsund manns í eynni helgina sem Hátíð Hafsins  var haldin í Reykjavík, segir í fréttatilkynningu.

Að sama skapi var slegið aðsóknarmet í fyrstu þriðjudagsgöngu sumarsins því aldrei fyrr hafa svo margir gestir komið í fuglaskoðunargöngu í Viðey.

Um 150 gestir mættu með myndavélar og kíkja til að skoða og mynda fuglalífið í Viðey.

Jóhann Óli Hilmarsson fuglafræðingur leiddi gönguna og kvaðst hann aldrei áður á sínum ferli sem fuglaleiðsögumaður hafa farið fyrir svo stórum hópi.

Í tilkynningunni segir að sú nýbreytni að hafa Viðeyjarstofu opna á þriðjudagskvöldum falli vel í kramið hjá gestum Viðeyjar.