Styttist óðum í stóru ferðahelgarnar

„Stærstu helgarnar hafa verið fyrsta helgin í júlí og verslunarmannahelgin en umferð í júní hefur verið að aukast. Álagstímabilið er því frá lokum júní til verslunarmannahelgar," segir Guðbrandur Sigurðsson, aðalvarðstjóri umferðardeildar lögreglunnar á höfuðborgarsvæðinu.

Undanfarin fimm til tíu ár hefur umferð til og frá höfuðborginni á sumrin aukist til mikilla muna. Hefur hún raunar verið svo mikil að vegakerfi höfuðborgarsvæðisins og nágrennis hefur illa ráðið við hana. „Vegirnir bera ekki meira en þeir eru hannaðir til. Þeir eru hannaðir fyrir dags daglega umferð en ekki toppana," segir Guðbrandur.

Helgin sem hefst í dag, sú síðasta í júní, hefur oft verið fyrsta stóra ferðahelgin. Árið 2007 sköpuðust sunnudagskvöldið 24. júní raðir upp á tugi kílómetra að Reykjavík. Á Vesturlandsvegi náði bílaröð alla leið frá Grundartanga að Mosfellsbæ og á Suðurlandsvegi náði hún frá Hveradölum að Reykjavík. Í fyrra skapaðist mikil umferðarteppa við lok 2+1 kaflans á Suðurlandsvegi á Hellisheiði sunnudagskvöldið 28. júní.

Aðspurður hvernig komast mætti hjá því að lenda í umferðarteppum sagði Guðbrandur enga töfralausn vera til staðar. Á venjulegri ferðahelgi færu flestir úr bænum á sama tíma, eftir að vinnu lýkur á föstudegi, og svo væru flestir á sama tíma á leiðinni til borgarinnar aftur á sunnudagskvöldi.

„Þeir sem vilja losna við umferðarteppur leggja fyrr af stað. Fara heim á hádegi á sunnudag og taka sér jafnvel frí eftir tólf í vinnunni á föstudegi og leggja fyrr af stað," sagði Guðbrandur enn fremur.

Skýringin á aukinni umferð undanfarin ár er aðallega sú mikla fjölgun skráðra ökutækja sem varð allt fram að bankahruninu haustið 2008. Annað sem hefur haft áhrif er aukinn straumur ferðamanna til landsins, en þeir leigja margir bílaleigubíla, og gífurleg fjölgun ferðavagna svo sem fellihýsa í eigu Íslendinga.

Mikil umferð hefur ekki í för með sér meiri slysahættu því umferðin verður þung og hæg. Lögreglan varar hins vegar eindregið við glæfralegum framúrakstri við þessar aðstæður og biður fólk að hafa eftirfarandi spakmæli í huga: minni hraði, minni skaði.

magnusl@frettabladid.is