Kvikmyndastjarna í ævintýraferð með Kúbu-romm og vindla

„Maður er bara búinn að vera sofandi og er enn nokkuð vankaður yfir tímamismuninum,“ segir leikarinn Alexander Briem. Hann er nýkominn heim úr þriggja vikna ævintýraferð til Kúbu ásamt tveimur vinum sínum þar sem náin kynni við kúbverskt romm og vindla voru meðal efnisatriða á dagskránni.

Alexander verður heimsfrægur á Íslandi á annan í jólum þegar kvikmyndin Gauragangur verður frumsýnd. Þar leikur Alexander Orm Óðinsson, eina þekktstu skáldsagnapersónu íslenskra unglingabókmennta.

Alexander vill hins vegar ekki ganga svo langt að kalla Kúbuferðina manndómsvígslu þótt allan lærdóm, að hans mati, megi flokka sem einhvers konar manndómsvígslu.

„En þetta var allt öðruvísi en maður á að venjast, nýr heimur.“ Alexander segir að þeir hafi eytt fyrstu vikunni á hefðbundnum ferðamannastöðum en svo hætt sér djúpt í fátækragettóin þar sem reggeaton hljómaði látlaust og romm og kúbuvindlar voru á hverju strái. „Við vorum oft staddir í aðstæðum sem maður sér bara í bíómyndum,“ segir Alexander.

Alexander segir ferðina sjálfa hafa gengið áfallalaust fyrir sig ef undanskilinn er síðasti dagurinn, hann reyndist ansi örlagaríkur. „Við höfðum komist af án þess að vera rændir og vorum bara á leiðinni út á flugvöl með rútu þegar ég áttaði mig á því að ég hafði gleymt veskinu mínu á hótelinu þaðan sem við tókum rútuna. Við fórum til baka, fundum veskið en það var auðvitað tómt,“ útskýrir Alexander. Til að bæta gráu ofan á svart eyddust út allar myndirnar sem þeir félagar höfðu tekið.- fgg