400 ökumenn stöðvaðir um helgina

Tæplega fjögur hundruð ökumenn voru stöðvaðir á höfuðborgarsvæðinu um helgina í sérstöku umferðareftirliti lögreglunnar.

Í tilkynningu frá lögreglunni segir að átta ökumenn hafi reynst ölvaðir við stýrið og eiga þeir ökuleyfissviptingu yfir höfði sér. Þá var fjórum til viðbótar gert að hætta akstri sökum þess að þeir höfðu neytt áfengis en voru þó undir leyfilegum mörkum. Sem fyrr höfðu margir ökumenn ekki ökuskírteini meðferðis en slíkt kæruleysi kostar viðkomandi 5.000 krónur.

„Markmiðið með ofangreindu átaki er að vekja athygli á þeirri hættu sem stafar af ölvunar- og fíkniefnaakstri og hvetja fólk til almennrar varkárni í umferðinni. Minnt er á viðvörunarorðin Eftir einn ei aki neinn en þau eiga alltaf við. Átakið nær að sjálfsögðu einnig til aksturs undir áhrifum lyfja en afleiðingar þess geta sömuleiðis verið skelfilegar," segir í tilkynningunni.