Vilja semja við kvótaeigendur um nýtingarrétt á aflaheimildum

Meirihluti sáttanefndar um endurskoðun laga um stjórn fiskveiða leggur til að samið verði við kvótaeigendur um nýtingarrétt á aflaheimildum til ákveðins tíma gegn leigugjaldi. Þetta kemur fram í skýrslu nefndarinnar sem var afhent ráðherra nú í morgun.

Um er að ræða svokallaða samningaleið en hún felur í sér að ríkið gangi til samninga við núverandi kvótaeigendur um nýtingarétt á aflaheimildum til ákveðins tíma. Talað er um 15 til 25 ár í því samhengi. Þá er einnig gert ráð fyrir því að sjávarútvegsfyrirtæki greiði sérstakt leigugjald en samningar endurnýjast hins vegar sjálfkrafa.

Ennfremur leggur nefndin til að fiskveiðiauðlindin verði skilgreind sem þjóðareign í stjórnarskrá.

Meirihluti nefndarinnar, þar á meðal hagsmunaraðilar, féllst á þess leið en minnihluti nefndarinar vildi fara uppboðsleiðina svokölluðu.

Guðbjartur Hannesson, er formaður nefndarinnar. Aðspurður hvort það sé búið að falla frá fyrningaleiðinni svaraði hann:

„Fyrning var aldrei inni í stjórnarsáttmálanum sem slík. Menn hafa alltaf einhverjar ákveðnar hugmydnir hvað fyrning er. Þegar við töluðum um innköllun á endurúthlutun á 20 árum þá er engan vegin búið að falla frá því, það þýðir í raunveruleikanum að það sé gengið skýrt frá eignarhaldinu. Þeir sem séu handahafar þessarar heimilldar með aflamarki til eins árs í senn að þeim sé gert ljóst að þeir séu ekki eigendur þessarar auðlindar heldur þjóðin og geta eingöngu haft af því tímabundinn afnotarétt."

En á eftir að útfæra tillögur nefndarinnar og það mun koma í hlut sjávarútvegsráðherra að vinna úr skýrslunni. Guðbjartur telur að sú vinna muni taka nokkra mánuði til viðbótar.

„Það er meginniðurstaða hópsins að skoða ákveðnar hugmyndir en ég lít svo á að það sé svo margt óljóst hvernig það verður útfært þannig að það verður heilmikil framhaldsvinna til að komast að niðurstöðu í málinu," segir Guðbjartur.

Skýrsluna má í heild sinni sjá hér.