Fimmta tjón Náttúrufræðistofnunnar - vatnsleki eyðilagði gróðurkort

Litlu mátti muna að stórtjón hefði orðið í geymslu Náttúrufræðistofnunnar Íslands í Súðavogi ef ekki hefði verið fyrir Þorvald Björnsson, starfsmanns stofnunarinnar, en þegar hann kom til vinnu var geymslan full af vatni. Vatnið náði honum upp að ökklum og hafði lekið niður af efri hæðinni, sennilega vegna mannlegra mistaka.

Svo virðist sem gleymst hafi að skrúfa fyrir krana á efri hæðinni en það er ekki ljóst.

Gróðurkort skemmdust að sögn Þorvalds, það kemur þó ekki að sök því til eru negatífur af kortunum og því lítill skaði skeður. Hefði Þorvaldur hinsvegar ekki mætt til vinnu á sunnudagsmorgninum þá hefði kassi fullur af glerkrukkum sem innihalda ýmis sýni fallið á gólfið og tjónið orðið gífurlegt.

„Þegar ég fór heim klukkan fimm í gær var allt í lagi," segir Þorvaldur en hann kom aftur til vinnu sjö í morgun. Þá blasti við honum tommulag af vatni.

Í geymslunni má finna ómetanlega hluti, meðal annars frá seinni hluta nítjándu aldar.

„Þetta er fimmta tjónið sem við lendum í," segir Þorvaldur en Náttúrufræðistofnun er búin að vera á hrakhólum í tugi ára og áður lent í rakaskemmdum vegna húsnæðis sem hentar ekki stofnuninni. Það stendur hinsvegar til bóta því stofnunin mun flytja inn í splunkunýtt húsnæði í Urriðaholtinu næsta haust.