Borgarstjóri býður „góðan dag“

„Ég er ekki frá því að það sé léttara yfir fólki," segir Hulda Gunnarsdóttir, upplýsingafulltrúi Reykjavíkurborgar, af því tilefni að „Góðan daginn"-dagurinn er í dag.

Á „Góðan daginn" daginn á maður að vera sérstaklega góður við náunga sinn, bjóða honum góðan daginn, og er þetta gert til að auka náungakærleik og viðhalda góðri íslenskri hefð.

Útfærslan er hverjum og einum í sjálfsvald sett, mestu máli skiptir að vera almennilegur við fólk, brosa til þess og svo að sjálfsögðu bjóða því góðan daginn. Og hvernig við bjóðum fólki góðan daginn skiptir ekki höfuðmáli, það sem máli skiptir er að gera það.

Fjölmargir eru þegar búnir að bjóða Huldu góðan daginn það sem af er degi. Hún bendir á að það sé gömul og rótgróin íslensk hefð að heilsa fólki með þessari kveðju og nú vilji Reykjavíkurborg einfaldlega minna á þennan góða sið.

Plaköt þar sem minnt er á daginn hafa verið hengd upp víða um borgina og viðbrögðin hafa verið góð. „Fólki finnst þetta mjög skemmtilegt," segir Hulda.

Hugmyndin að Góðan daginn-deginum kom upphaflega frá Jóni Gnarr, borgarstjóra. Hann hefur vitanlega heilsað Huldu í dag. „Já, hann er búinn að koma hér og bjóða mér góðan daginn, hátt og snjallt," segir hún.

Jón byrjaði daginn á Facebook þar sem hann heldur úti dagbók borgarstjóra og heilsaði borgarbúum: „Góðan daginn, elsku borgarar!"

Hann útbjó einnig myndband á léttu nótunum í tilefni dagsins, og má sjá það með því að smella hér.