Leggja til breytingar á meðlagskerfinu

Nefnd sem falið var að endurskoða ákvæði barnalaga um framfærslu barna leggur til umfangsmiklar breytingar á meðlagskerfinu. Í frumvarpi sem nefndin hefur sett saman er lagt til rýmri samningsfrelsi foreldra um skiptingu kostnaðar vegna framfærslu barns og um greiðslu meðlags. Áhugasamir eru hvattir til að að kynna sér efni þess og senda dómsmála- og mannréttindaráðuneytinu ábendingar.

Í frumvarpinu er lagt til að rýmka samningsfrelsi foreldra um skiptingu kostnaðar vegna framfærslu barns og um greiðslu meðlags, að fram kemur í tilkynningu. Rökin eru fyrst og fremst þau að ábyrgð á framfærslu barns hvíli á herðum foreldra. Þá þykir það barni almennt fyrir bestu ef foreldrum sem ekki búa saman tekst að ná samstöðu um öll atriði sem varða hagsmuni barns. Þannig er meðal annars lagt til að skylda til að semja um meðlag við skilnað og sambúðarslit foreldra verði afnumin og enn fremur að ákvæði um lágmarksfjárhæð meðlags verði afnumið.

Ef foreldrum tekst ekki að semja um skiptingu kostnaðar af framfærslu barns er gert ráð fyrir að unnt verði að úrskurða það foreldri sem barn býr ekki hjá til að greiða meðlag með barninu. Í frumvarpinu er lagt til að miðað verði við að lágmarksframfærslukostnaður barns sé 54.000 krónur og að við meðlagsákvörðun skuli skipta lágmarksframfærslukostnaði barns milli foreldra í hlutfalli við tekjur eða aflahæfi beggja. Við afmörkun tekna er fyrst og fremst gert ráð fyrir skattskyldum tekjum beggja en einnig er gert ráð fyrir að bæta við tekjurnar þeim barnabótum sem foreldri fær eða mun fá vegna viðkomandi barns. Með þessu móti má segja að barnabætur nýtist báðum foreldrum, að fram kemur í tilkynningunni.



Almenningur getur gert athugasemdir við frumvarpið

Í nefndinni, sem þáverandi dómsmálaráðherra skipaði árið 2008, áttu sæti þau Guðný Björk Eydal, prófessor í félagsráðgjöf við Háskóla Íslands, sem jafnframt var formaður, Hrefna Friðriksdóttir, lektor í sifja- og erfðarétti við Háskóla Íslands, og Ásgeir Eiríksson, fulltrúi sýslumannsins í Keflavík. Starfsmaður nefndarinnar var Guðmundur Örvar Bergþórsson, lögfræðingur í dómsmála- og mannréttindaráðuneytinu.

Frumvarpið er nú lagt fram til kynningar og eru áhugasamir hvattir til að kynna sér efni þess og senda ráðuneytinu ábendingar og athugasemdir á netfangið postur@dmr.stjr.is fyrir 15. febrúar næstkomandi.