Ólína Þorvarðar: Ætlar Geir að persónugera vandann nú?

„Einu sinni sagði Geir H. Haarde að nú væri ekki rétti tíminn til þess að persónugera vandann og mér finnst sorglegt ef hann ætlar að persónugera það sem gerðist á Alþingi í dag," svaraði Ólína Þorvarðardóttir, þingmaður Samfylkingarinnar, þegar hún var spurð í Kastljósi um ummæli Geirs þar sem hann sagði framgöngu Samfylkingarinnar loddaraleik.

Ólína greiddi atkvæði með því að Geir yrði ákærður í dag.

Hún segist hafa gert málið upp eftir sinni sannfæringu. Sú ákvörðun hafi ekki verið auðveld. Ólína lýsir því að hún hafi gengið í gegnum mikið hugarstríð til þess að komast að þeirri niðurstöðu að það ætti að ákæra Geir.

„Ef það heitir pólitískur loddaraskapur að fylgja sinni sannfæringu þá er ég stoltur pólitískur loddari," sagði Ólína.

Sigurður Kári Kristjánsson, þingmaður Sjálfstæðisflokksins, sagði að sér hefði verið misboðið þegar hann fylgdist með atkvæðagreiðslunni á Alþingi í dag.

„Mér er misboðið hvernig gengið var fram og ég trúi ekki öðru en að kjósendum sé líka misboðið," sagði Sigurður Kári um málið en þingmenn Sjálfstæðisflokksins greiddu allir atkvæði gegn því að fyrrverandi ráðherrarnir yrðu ákærðir.

Sigurður Kári sagðist aðspurður að hann sæi því ekkert til fyrirstöðu að Björgvin G. Sigurðsson, fyrrverandi viðskipta- og efnahagsráðherra tæki aftur sæti á Alþingi en hann hefur verið í leyfi síðan byrjað var að skoða ábyrgð ráðherranna.

Ólína var ekki jafn afdráttarlaus og sagðist ekki geta svarað þeirri spurningu. Í raun þyrfti Björgvin að taka þá ákvörðun sjálfur.