Rauði krossinn vill fá 3000 til að ganga til góðs

Rauði kross Íslands óskar eftir 3.000 sjálfboðaliðum um allt land laugardaginn 2. október til að Ganga til góðs. Í tilkynningu frá Rauða krossinum segir að markmiðið sé að virkja tæplega 1 prósent af íslensku þjóðinni til að sameinast um eitt málefni og leggja sitt að mörkum til að byggja betri heim.

Þetta er í sjötta sinn sem Rauði krossinn gengur til góðs til styrktar alþjóðaverkefnum sínum. Í söfnuninni er gjarnan litið til langtíma samstarfsverkefna Rauða kross Íslands sem eiga undir högg að sækja varðandi fjármögnun, en þar sem þörfin er engu að síður eins aðkallandi og brýn og þar sem náttúruhamfarir og átök geisa. „Í söfnuninni í ár hefur Rauði krossinn sett á oddinn verkefni félagsins í Malaví fyrir börn og ungmenni sem eiga um sárt að binda vegna alnæmis, og Síerra Leóne þar sem um eru að ræða verkefni fyrir stríðshrjáð börn og endurhæfingu barnahermanna," segir ennfremur.

Þá segir að það sem geri söfnunina Göngum til góðs frábrugðna öðrum söfnunum er að ekki er einungis verið að leita eftir fjárstuðningi heldur einnig að fá fólk til að sýna samstöðu í verki með því að gerast sjálfboðaliðar eina dagsstund. „Þannig geta allir tekið þátt í söfnuninni - ýmist með því að ganga eða gefa. Þeir sem ganga hús úr húsi gegna ákaflega mikilvægu hlutverki, en það væri til lítils ef ekki væru einhverjir heima til að taka á móti þeim og stinga fé í baukinn."

Á höfuðborgarsvæðinu eru 24 söfnunarstöðvar í öllum hverfum Reykjavíkur og í Kópavogi, Garðabæ, Hafnarfirði, Mosfellsbæ og á Álftanesi og Seltjarnarnesi. Fólk sem vill ganga til góðs með Rauða krossinum er hvatt til að skrá sig á www.raudikrossinn.is eða í síma 570 4000.