Skilanefnd tekur yfir D‘Angleterre-hótelið

Skilanefnd Landsbankans mun á næstu vikum taka yfir hótel­rekstur NP Hotels í Danmörku og einkaþotur í eigu leigufyrirtækisins IceJet. „Samningar eru mjög langt komnir og við erum mjög sátt við það,“ segir Páll Benediktsson, upplýsingafulltrúi skilanefndar Landsbankans.

NP Hotels og IceJet eru bæði í eigu eignarhaldsfélagsins Nordic Partners. Undir NP Hotels heyrir lúxushótelið D‘Angleterre auk hótela og veitingastaða á borð við Kong Fredrik og Front. Nordic Partners keypti hótelið á haustmánuðum 2007 og greiddi langt yfir uppsettu verði. IceJet hefur yfir að ráða fimm Dornier-þotum, sem hafa verið innréttaðar fyrir efnaða einstaklinga og gerðar út frá Bretlandi. Reynt hefur verið að selja þrjár þeirra síðustu mánuði.

Umfangsmesti rekstur Nordic Partners felst í matvælaframleiðslu og útleigu á fasteignum í Lettlandi. Fram kom í Viðskiptablaðinu seint í fyrra að heildarskuldir eru í kringum níutíu milljarðar króna.

„Staðan í Lettlandi er litlu betri en hér. Reksturinn er gríðarlega erfiður og fyrirtæki þar hafa orðið fyrir miklum skakkaföllum,“ segir Friðrik Jóhannsson, fyrrverandi forstjóri Straums-Burðaráss, sem hefur unnið að fjárhagslegri endurskipulagningu Nordic Partners. Hann bendir á að róðurinn hafi þyngst við hrun fasteignamarkaðarins þar auk þess sem leiguverð hafi lækkað mikið en Nordic Partners á fjögur hundruð þúsund fermetra af leiguhúsnæði í Lettlandi. „Þetta hefur haft mikil áhrif á reksturinn,“ segir hann. Unnið er að samningum um örlög matvælafyrirtækjanna við Eystrasalt með stjórnendum Nordic Partners.

Ekki er reiknað með breytingum á eignarhaldi tékkneska matvælafyrirtækisins Hamé, sem er skráð sem systurfyrirtæki Nordic Partners. Gamli Landsbankinn fjármagnaði kaupin á Hamé líkt og flest annað hjá Nordic Partners. - jab