Formaður SI vill að Kristján Möller sitji áfram sem ráðherra

Helgi Magnússon, formaður Samtaka iðnaðarins, telur ástæðu til að óttast að uppstokkun í ríkisstjórn geti heft framgang samgönguframkvæmda hverfi núverandi samgönguráðherra, Kristján Möller, úr stjórn. Þetta kemur fram í tilkynningu frá samtökunum.

Þar segir einnig að Helgi telji að Kristján hafi sýnt framkvæmdum mikinn áhuga og hætt sé við að stór verkefni sem séu við það að komast í gang með lánsfé frá lífeyrissjóðunum tefjist.

„Aðilar vinnumarkaðarins hafa hvatt mjög til aukinna framkvæmda. Við teljum að nú sé rétti tíminn til að leggja áherslu á samgönguframkvæmdir" segir Helgi.

Helgi telur hættu á að þessi mál tefjist frekar en orðið er þar sem óljóst er hvernig nýr ráðherra muni taka á málum.