Öflugri flugsveitir vekja spurningar

Ákvörðun bandaríska flughersins, að senda hingað á morgun mun öflugri flugsveit til loftrýmisgæslu en áður hefur tíðkast, hefur vakið spurningar innan íslenska stjórnkerfisins hvort hún tengist áhuga herforingja NATO á að Íslandi verði komið upp eftirlitsmiðstöð fyrir norðurslóðir.

Bandaríski herinn lét í fyrra nægja að senda fjórar F-15 orustuþotur til að annast loftrýmisgæslu Íslands, sama fjölda og sendur var til æfinga hérlendis fyrir tveimur árum. Því vekur það sérstaka athygli að Bandaríkjamenn hafa nú ákveðið að senda tíu þotur til landsins, en þær eru væntanlegar á fimmtudag. Með orustuþotunum koma 175 liðsmenn Bandaríkjahers en einnig eldsneytisbirgðavél og herflutningavélar eru þegar byrjaðar að flytja hingað búnað.

Utanríkisráðherra hefur ekki aðra skýringu á þessum aukna áhuga Bandaríkjamanna á íslenska loftrýminu en að þeir telji þetta gott tækifæri til að þjálfa flugsveitina.

„Það eru sérstakar aðstæður hérna. Hér erum við nálægt úthafi og hér eru meiri möguleikar tel ég til að æfa tiltekna þætti. Það er eina skýringin sem ég hef á þessu," segir Össur Skarphéðinsson, utanríkisráðherra.

Innan íslenska stjórnkerfisins spyrja menn hins vegar hvort þetta séu merki um vaxandi hernaðarlegt mikilvægi norðurslóða, sem hermálasérfræðingar sjá blasa við með aukinni vitneskju um verðmætar auðlindir, eins og olíu og málma, sem þar megi vinna.

Þannig hefur fréttastofan heimildir fyrir því að háttsettur maður innan herja Atlantshafsbandalagsins hafi fyrir ekki allslöngu viðrað þau sjónarmið að Ísland gæti hentað sem miðstöð fyrir hluta af framtíðareftirlitskerfi NATO með norðurslóðum.