Samninganefndin heldur ótrauð áfram

„Okkar vinnu Íslandsmegin miðar vel. Það er engin bilbugur á okkar fólki og góður taktur í þessu öllu saman og ég held að það sama verði að segja ESB-megin," segir Stefán Haukur Jóhannesson, formaður samninganefndar Íslands í aðildarviðræðum við Evrópusambandið.

Skiptar skoðanir hér á landi um viðræðurnar trufla samninganefndina ekki. Þetta var meðal þess sem kom fram í máli Stefáns í Kastljósi í kvöld.

Um það sagði Stefán: „Ríkisstjórnin hefur þá stefnu að ganga til þessara viðræðna og leiða þær til lykta og leggja síðan samninginn í dóm þjóðarinnar. Það hefur ekkert breyst. Undirliggjandi er þessi ályktun sem samþykkt var á Alþingi í fyrra sem veitti ríkisstjórninni umboð til þess að fara í þessar viðræður. Það er samkvæmt þessu umboði, ég í umboði utanríkisráðherra, sem þessi vinna er unnin."