Tvískinnungur íslenskra útgerðarmanna

Evrópusambandssinnar segja það til marks um tvískinnung íslenskra útgerðarmanna að á sama tíma og þeir berjast gegn aðkomu útlendinga í íslenskum sjávarútvegi kaupi þeir upp kvóta innan lögsögu Evrópusambandsins.

Eitt öflugasta útgerðarfélag Íslands, Samherji, hefur yfir að ráða stórum hluta af úthafsveiðiheimildum nokkurra ríkja Evrópsumbandsins í gegnum dótturfélög meðal annars í Bretlandi og Þýskalandi eins og fram kom í fréttum stöðvar tvö í gær.

Íslenskir útgerðarmenn eru almennt á móti aðild að Evrópusambandinu og byggir þessi andstaða meðal anars á ótta þeirra við að útlendingar geti eignast meirihluta í íslenskum sjávarútvegsfyrirtækjum.

„Þetta horfi við mér þannig að mér finnst gleðilegt að vita að Samherji stendur sig vel innan Evrópusambandsins en um leið sýnir þetta vissan tvískinnung í málflutningi útgerðarmanna þar sem að þeir vilja sitja einir að sínu hér en um leið vilja þeir frjálsan aðgang annars staðar eða nýta sér það út í ystu æsar," segir Jón Steindór Valdimarsson, hjá Sterkara Íslandi.

Áður hefur verið greint frá því að að sex af tíu stærstu útgerðarfyrirtækljum landsins gera nú upp í Evrum.

„Þetta snýst á endanum um völd og áhrif og þeir meta það þannig að það sé skynsamlegt að sitja einir að því að tala við íslensk stjórnvöld en blanda ekki öðrum stjórnvöldum í það. Þetta er týpískt - haldu mér slepptu mér," segir Jón Steindór.

Fréttastofa hafði samband við Friðrik J. Arngrímsson, framkvæmdastjóra LÍÚ, í dag en hann baðst undan viðtali.