Leggur til að menning og listir verði lagðar niður í sólarhring

Hljómplötuútgefandinn Baldvin Esra Einarsson, sem rekur Kimi Records, er kominn með nóg af árlegri umræðu um sóun fjármuna í listir á Íslandi. Hann hvetur Bandalag íslenskra Listamanna (BÍL) til þess að fara í eins dags allsherjarverkfall til þess að minna á mikilvægi listarinnar.

Þetta kemur fram í formlegu bréfi frá honum til formanns BÍL. Í bréfinu segir Baldvin að hann sé ekkert sérstaklega að elta ólar við ummæli Ásbjörns Óttarssonar, þingmanns Sjálfstæðisflokksins, heldur sé hann orðinn langþreyttur á því að umræðan poppi upp árlega.

„Umræðan er leiðinleg og engum til framdráttar og ef fólk gerir sér grein fyrir gildi menningar í samfélagi okkar þá mun ekki nokkur maður leggja í það að brydda á þessu máli aftur," skrifar Baldvin sem vill að í allsherjarverkfallinu verði einnig lagt blátt bann við neyslu hverskyns listar.

Til útskýringar skrifar Baldvin:

„Þá á ég við að eftirtaldir aðilar leggi niður vinnu og banni alla notkun á verkum sínum: Arkitektar, handritshöfundar, hönnuðir (fata-, grafískir, húsgagna-, leikmynda- osfrv.), kvikmyndagerðarfólk, leikarar, leikstjórar, listdansarar, rithöfundar myndlistarfólk, tónlistarfólk og tónskáld.

Bannið ætti því að ná til allra listaverka í íslensku samfélagi hvar sem það kann að birtast. Engin mætti leika eða selja tónlist, sjónvarp og kvikmyndahús mætti ekki sýna efni nema það væri gjörsamlega án alls listræns framlags, ekki mætti selja eða lesa bækur, leikhús myndu loka, öll myndlist og styttur á almenningi yrði hulin, hús teiknuð af arkitektum yrðu hulin, öll tímarit og dagblöð yrðu án verka listamanna og svo framvegis."

Það er nokkuð ljóst að sá sólarhringur yrði heldur fátæklegur en Baldvin leggur til að verkfallið verði haldið 9. október, sama dag og bítillinn John Lennon fæddist.