Ökuníðingar, innbrotsþjófar og slagsmálahundar

Lögregla hafði í nógu að snúast í nótt um alla borg. Í miðbænum sást til ökumanns sem ók undarlega og ætlaði lögregla að stöðva manninn. Hann gaf hinsvegar í og ók á miklum hraða eftir götum miðborgarinnar. Að lokum var hann stöðvaður í Þingholtunum og reyndist um 17 ára pilt að ræða með bráðabirgðaökuskírteini. Hann var að auki ölvaður og fékk hann að sofa úr sér á lögreglustöðinni.

Brotist var inn í Vatnsendaskóla í Kópavogi í nótt. Þjófarnir komust á brott með skjávarpa og tölvu. Þá var farið inn í heimahús í Árbæ en þjófarnir spenntu upp glugga til þess að komast inn. Þeir höfðu heimilistölvuna upp úr krafsinu.

Tilkynnt var um líkamsárás í veislu í Víkingsheimilinu um klukkan hálfeitt í gærkvöldi. Maður sló annan í andlitið og missti sá tvær tennur og meðvitund. Hann var fluttur á slysadeild en árásarmaðurinn í fangageymslur. Lögregla var einnig kölluð í Árbæinn um klukkan hálfþrjú en þar ógnaði maður konu með hnífi. Fólkið mun hafa þekkst og var maðurinn mjög ölvaður og æstur þegar lögreglu bar að garði. Hann vann þó engum mein og var handtekinn.

Tveir ökumenn voru teknir fyrir of hraðan akstur í nótt á Vesturlandsvegi. Annar ók á 112 kílómetra hraða og hinn á 110 kílómetra hraða.