Eiður Smári neitar ásökunum um framhjáhald

Eiður Smári Guðjohnsen neitar að hafa átt í ástarsambandi við Vanessu Perroncel árið 2003 en enska dagblaðið The Sun fjallar ítarlega um meint framhjáhald hans í dag.

Konan sem Eiður er sagður hafa haldið við heitir Vanessa Perroncel, og er frönsk fyrirsæta. Undanfarna daga hefur breska pressan fjallað ítarlega um ástarsamband hennar við enska landsliðsfyrirliðann John Terry en það mál þykir mikið hneyksli þar sem Vanessa er barnsmóðir Wayne Bridge, sem er leikmaður enska landsliðsins þar sem Terry er fyrirliði.

Málið tók nýja stefnu í dag þegar The Sun sagði frá því að Eiður Smári Guðjohnsen hafi einnig átt í sambandi við Vanessu Perroncel. Blaðið segir að þau hafi hist árið 2003 á skemmtistaðnum Elysium í London þegar Eiður var enn leikmaður Chelsea.

Blaðið fullyrðir að Eiður hafi nokkrum sinnum heimsótt Vanessu að heimili hennar sem er skammt frá heimavelli Chelsea og eytt þar nóttinni.

Eiður, sem er þriggja barna faðir og hefur verið í sambúð með íslenskri barnsmóður sinni frá unglingsaldri, neitaði fullyrðingum The Sun í gær.

Hann segir við blaðið að hann hafi ekki átt í ástarsambandi við Vanessu.