Lítil breyting á meðallánum

Heildarútlán Íbúðalánasjóðs námu rúmum 1,6 milljörðum króna í síðasta mánuði. Þetta er rúmlega helmingssamdráttur á milli ára og fjórðungslækkun á milli mánaða. Heildarútlánin námu 2,8 milljörðum króna í febrúar fyrir tveimur árum.

Af heildarútlánum sjóðsins runnu 1,4 milljarðar króna til almennra fasteignalána og 250 milljónir til almennra lána.

Guðmundur Bjarnason, forstjóri Íbúðalánasjóðs, segir samdrátt á íbúðamarkaði hafa verið viðvarandi síðustu mánuði og komi það skýrt fram í mánaðarskýrslu sjóðsins. Erfitt sé að spá fyrir um þróun mála. Hann bætir við að febrúar hafi verið sérstaklega slæmur þótt sambærilegar tölu megi finna í ágúst í fyrra.

Á hinn bóginn bendir Guðmundur á að meðallán til einstaklinga hafi hækkað um 22 prósent á milli mánaða í febrúar. Þau námu níu milljónum króna samanborið við 7,4 milljónir í janúar. Þau hafa sveiflast talsvert á milli ára. Í febrúar í fyrra stóð meðalfasteignalán Íbúðalánasjóðs í 10,7 milljónum króna en í 8,6 milljónum árið 2008 og í 9,2 milljónum króna í sama mánuði árið 2007. - jab