Jóhanna á fundi með Barroso

Jóhanna Sigurðardóttir, forsætisráðherra, situr þessa stundina á fundi með José Manuel Barroso forseta framkvæmdastjórnar Evrópusambandsins í Brussel. Fundurinn hófst klukkan tíu að íslenskum tíma og er áætlað að hann standi í um 45 mínútur.

Ekkert hefur verið gefið upp um efni fundarins sem farið hefur mjög leynt að hálfu forsætisráðuneytisins. Fastlega má þó búast við að aðildarumsókn Íslands að Evrópusambandinu verði rædd, sem og staðan í Icesave deilunni við Breta og Hollendinga.

Fyrr í vikunni var gefið út að ekki yrðu heimilaðar myndatökur af því þegar Jóhanna og Barroso hittust en eftir fyrirspurnir frá íslenskum sem og evrópskum fjölmiðlum var loks gefið leyfi fyrir myndatökum.