Þungir dómar fyrir fíkniefnaverksmiðju staðfestir

Hæstiréttur staðfesti í dag þunga fangelsisdóma yfir Jónasi Inga Ragnarssyni og Tindi Jónssyni vegna aðildar þeirra að fíkniefnaverksmiðju sem var upprætt í Hafnarfirði sumarið 2008. Héraðsdómur Reykjanes dæmdi Jónas Inga í tíu ára fangelsi og Tind í átta ára fangelsi vegna málsins.

Í húsnæðinu í Hafnarfirði fundust meðal annars 38 kíló af efninu P-2-NP, sem notað er til að búa til milliefnið P-2-P, sem notað er við framleiðslu á amfetamíni og metamfetamíni. Báðir neituðu fyrir dómi að hafa ætlað að framleiða fíkniefni.

Jónas Ingi kom við sögu í einu umtalaðasta sakamáli síðari ára. Hann var einn þeirra sem hlaut fangelsisdóm í hinu svokallaða "Líkfundarmáli" á Neskaupsstað. Fyrir aðild að því mál hlaut hann tveggja og hálfs árs fangelsisdóm.

Tindur hlaut sex ára fangelsisdóm, 19 ára gamall, fyrir hrottalega líkamsárás í Garðabæ árið 2005 þegar hann réðist að öðrum pilti vopnaður sveðju.